Act 19 | TVK | STEP | Melele xa Apolos di tamu e Korin, Pol mikakao nggo vathu xil te provins tahal Kalesia e mei mistal e Episis. E inggak, xi mikamet rut Kristin xil.

Acts 19

Moletin Xil tahal Episis Mei Lapolu ni Ninin Eo

1 Melele xa Apolos di tamu e Korin, Pol mikakao nggo vathu xil te provins tahal Kalesia e mei mistal e Episis. E inggak, xi mikamet rut Kristin xil. 2 Ma misis xil bitene, “?Melele xa mei muneket e Hi, Ninin Eo temei e xamim?”

E xil labit rilomun ni mini labit, “E-e. Xamem matakil ti mu xa Ninin Eo be naha.”

3 Ma Pol misis xil mun bitene, “?Ma xamim munggur hisit teriren eah?”

E xil labiteni mini labit, “Manggur hisit teriren xa nggoni ngan taxa Sion di tepol ni.”

4 Ma Pol biteni mi xil bit, “Teriren xa Sion tepol ni tehe na moletin xil tengan lihiles ra tesaen nae xil. E xi tehiteni mi Siu xil tengan lineket e ngan xa imei itutou ni, ngan ak be Iesu.”

5 Melele xa lalong sepinien ak, lamae ni Pol xatel latobaptaes ni xil e oei e his Suv Iesu. 6 Di, Pol miling hen e xil, e Ninin Eo mei polu e xil, ma di lasepin ni sepinien sav xil e di lake mese ni sepinien eo xil na Hi. 7 Moletin xil ak labe lu e le (12).

8 Aveti tol (3) iaxa Pol dit tehe nim te pispisien na Siu xil e di tesep tetavoe tetel moletin xil e tesep kila mi xil suse xa Hi mei ihe suv toto e meulien nae. Xi tesepin mi xil, e ulin tenakan ti. 9 E rut ngan xil, vatie nggeih ma lataneket ti e sepinien na Pol. E pe met moletin xil, moletin xil ak di laso sepinien xil xa misa ba ni Kristin xil xa langgusil xat 'Suse na Suv Iesu'. Misak ni Pol miling xil e midel ngan xil xa laneket langgusili. E melengien xil vus, be von vitueien na moletin tei, hisen Tiranas, e di misep tetavoe del moletin xil usil suse xa Hi mei ihe suv toto e meulien nae. 10 Huram lu (2), Pol di tepol ni temak, ma moletin xil vus xa ladi e provins tahal Esia latelong sepinien usil Suv Iesu, Siu xil e ngan tesav xil mun xa latave Siu ti.

Horam Maxoe Xil na Skeva Lasak Tengan Lapol ni Merekel Tova e His Iesu

11 E melele nen ak, Hi di tepol ni hisit merekel sav xil tehe holu latestal latexo Pol. 12 Mak iaxa, moletin xil di laleh kaliko te vetin nan tetel eising te polien nan xil tang, ba di latesa ni mi ngan xil xa latemesei. Melele xa xil laduxoli, meseien nae xil tevus reling xil e temat xil mun latlesae reling xil. 13 E melele nen ak, vanut moletin xil xa labe Siu di latekapis tengan lavol rerat temat xil ra moletin xil. Xil mun labit lipol ni itel his Suv Iesu. Ma melele xa di lapol, xil kekes di biteni mi temat xil mak, “!Nasemae ni xouk e his Iesu xa Pol di misetu usili tengan uhe reling moletin ak!”

14 E rute ak, Vatixar tei na pris xil teta, hisen Skeva, e horamue nan xil labe lu e he sav (7). Xil latehe vanut moletin tei xa di latepol ni temak. 15 Ma vatei, melele xa di lasak pisi tengan lapol ni vamak, ninin tesa tei biteni mi xil bitene, “Iesu nakila, e Pol mun nakila. ?E xamim, mube visi?”

16 Di, moletin xa temat di en but xat xatel e bas purun xatel misa. Dal papas eising nae reling xil e mikal kukul xil. Horam maxoe xil ak langgul ni re e lastal laloh hon tang reling tim san. 17 Melele xa Siu xil del ngan xil xa latave Siu ti lalongeong ni, xil uli xil mikan pupu. E moletin xil vus tahal Episis lapet rat his Iesu e lamerere ni. 18 Moletin xil hao mei laneket, e pe met moletin xil, labit rerat tesaen xil nae. 19 Xil hao xa di latepol ni eimas, laleh viton vanuvei nae xil xa sepinien te eimas di en, e mei ladin ni pe met moletin xil. E melele xa labit lakil kuh ti vatu nen, lakameti xa vatu nen duxoh milian be hanutap lu e hexalu mun (50,000,000). 20 Mak, ma Hi pisen xeihen nan e longeongen usil Iesu Kristo mei mikapis e ut ngasen, e moletin hao mu laneket en.

Vaeen Tei Mistal e Episis

21 Dutou ni ngan xa holesok xil ak testal, Pol pol ni nenemien nan tengan ikakao ha ixo provins tahal Masedonia e tahal Akeia, ti, ihe Serusalem. Xi minemi bit, “Melele xa nihe Serusalem ivus, niha sung e Rom.” 22 Ma xi misil moletin lu xa di ludutou ni tengan laltiamu ni lalhe Masedonia, hisealu Timoti e Urastas. E xi da luvoluv tamu e provins tahal Esia.

23 E melele xa Pol da tamu e Esia, iaxa vaeen tei xa eilep mistal e hal Episis ve Kristin xil xa di langgusil xat 'Suse na Suv Iesu'. 24 E rute ak, moletin tei da en xa di pol ni nanao xil ni silva xa nggur nini nim te moten na hi tei xa lakesi ni hi Artemis. Moletin ak, hisen Demitrias. Xi, del moletin nan xil mun, di langgur vatu xa eilep nggo en. 25 Ma mikes viton moletin nan xil vus del rute sav xil mun xa polien nae pipin tang. Di, xi biteni mi xil bitene, “Tiramue xil, mukila xa xir rapus hosien nar nggo e polien ak. 26 Xamim di mupusi e di mulongeong ni naha xa moletin ak di pol ni. Pol ak di biteni xa hi xil xa moletin xil tang di lapol ni, xil latave reitin ti. Xi pol ni moletin xil hao e Episis, e provins tahal Esia mun, mei lake reitin e nenemien ak e lastokovein moten nae ba mi Hi Artemis. 27 !Ngan ak misa pupu mi xir! Sepinien nan ipurun meulien te polien nar. E tave ti ngan ak kestang, sexien ak isak ni mun xa moletin xil linamerere ni ti mun nim te moten na Hi Artemis, hi nar xa be eilep pupu. Hi nar, moletin xil vus di lamerere ni, e provins tahal Esia del ut xil ngasen e ut etan. !E sepinien na moletin ak ipol ni his Hi Artemis mei ihe neta sav tang! !Ngan ak misa tova tang!”

28 Melele xa vanut moletin xil ak lalong sepinien xil ak, iexil mikat pupu. Ma latamea di lakekei ni nggeih labit, “!Artemis be hi na mol-Episis! !Rapet rat hisen!” 29 Rumen te ekaten mikapis e taon ak, e moletin xil ngasen mei lamos e vanut moletin xil ak. Di, xil ladal xat moletin lu te provins tahal Masedonia xa di lunggusil Pol lumei, hisealu Keas e Aristakas. Ladal kakao ni xalu mei ba laling xalu ludi e von vitueien nae xa eilep. 30 Pol ien bei vahe pe met moletin xil ak ha vasepin mi xil, e Kristin xil te rute ak latamae ni ti vaha. 31 Rut vat xil mun te provins ak, xa labe timue nan lasa sepinien ba da xole tengan nasak pisi ti nave von vitueien ak. 32 E rute ak, moletin xil di lapol ni rumen xa mahulong. Rut ngan xil di lameun ni neta tei. E ngan tesav xil di lameun ni neta sav mun. E moletin holu latakil ti veneh ma lamei vituei inggak. 33 Di, rut Siu xil ladivin vat tei nae mei misoh pe met moletin xil tengan mei isep motin rin na Siu xil, hisen Aleksanda. E melele xa moletin xil lapusi, lanemi labit xos xi iaxa be vat te vaeen ak. Di, Aleksanda misa hen be nesao tengan lati votei. 34 E melele xa lapus kila xa xi be Siu tei ^{▼▼19:34 Moletin xil lanemi labit Kristin xil e Siu xil latasav ti, labe hisit moletin tei takes.}, xil vus lakekei ni nggeih labit, “!Artemis be hi na mol-Episis! !Rapet rat hisen!” Xil langgulehi lameun mak ba vuma ... duxoh haoa lu (2).

35 Ba vuma, klak te taon ak mei misak ni moletin xil ladi votei. Di, biteni mi xil bitene, “!Moletin xil tahal Episis! Moletin xil vus lakila xa taon nar iaxa di miketeh xol nim te moten na hi Artemis. E xir di raketeh xol hat eo teni xa temot texo ut nesao temei etan. 36 Moletin tovuol vakila vahit netak be luvosen. Ma xamem muta merou tang, e munapol ni ti sexien xil xa mitallang. 37 Xamim mudel moletin xalu ak lumei inggak. E xalu lutenakan ni ti neta e nim te moten na hi nar, mu lutenaso ti sepinien xil xa misa vaha ni. 38 Xosxa Demitrias del moletin te polien nan xil iexil bei tengan laso sepinien tova xa misa vaha ni moletin tei, xil likila lipol ni sung mi moletin xati te lepisien e melengien xati teni. Ti, litotan, e moletin ak ilepis ngongoren nae sung. 39 E xosxa iemim bei neta ti mun, ma mutatil melengien xati te totanen nar xa ti imei, e moletin xil te kaonsel te taon ak iaxa imal ni sung. 40 !Naha xa rapol ni xosali ak tamal ti! E vat xil te taon nar likila lileh xir ngasen rihe von koten. E xosxa xil lipol ni imak, ma xir rasakras ravit mese ni mi xil ravit rapol ni rumen xa eilep xiak veneh.” 41 Melele xa misepin bus, xi misil rerat moletin xil ra von vitueien ak.